O Concello de Lousame pon en marcha un servizo municipal de recollida de aparellos eléctricos ou electrónicos (electrodomésticos, equipos informáticos, ferramentas eléctricas…), que xa non son recollidos pola Mancomunidade Serra do Barbanza. O servizo terá carácter mensual e os interesados deberán solicitalo no Concello chamando ao teléfono 981 820 494 a fin de organizar a recollida dos residuos.
Cando se trate de outro tipo de enseres, os veciños e veciñas deberán seguir comunicándose co servizo de recollida do lixo da Mancomunidade Serra do Barbanza, a través do teléfono 981 19 12 40. Un servizo que se realiza dúas veces ao mes. O Concello de Lousame lembra que está prohibido o depósito inxustificado de residuos xunto aos colectores de lixo ou en lugares non habilitados para este fin.
Neste sentido, o Concello de Lousame fai un chamamento á responsabilidade da veciñanza e lembra a necesidade de coidar o extraordinario medio natural do municipio. Ademais, en caso de incumprimento, o Concello veríase obrigado a adoptar as medidas pertinentes, incluída a imposición das sancións que procedan.
